Amaliy qo'llanmalar

Uchta raqam bir qatorga tushishi kerak: yuk toki ≤ avtomat nominali ≤ kabel chidami.

• Avval yuk tokini hisoblang (Kalkulyator → Tok hisobi).
• Kabel kesimini tanlang va uning ruxsat etilgan tokini toping.
• Shu ikkisining orasiga tushadigan standart nominalni oling: 6, 10, 16, 20, 25, 32, 40, 50, 63 A.

Agar avtomat kabel chidamidan katta bo'lsa — qisqa tutashuvda avtomat emas, sim kuyadi. Bu eng ko'p uchraydigan xato.

Xarakteristika: uy va yoritish uchun C, motor va katta ishga tushish toki bo'lgan yuk uchun D, elektronika uchun B.

Avtomat simni himoya qiladi, UZO esa odamni. UZO kirayotgan va chiqayotgan tokni solishtiradi; farq paydo bo'lsa (tok odam orqali yoki nam devor orqali oqib ketsa) — tarmoqni uzadi.

• Odam himoyasi uchun 30 mA.
• Hammom, nam xona, ko'chadagi rozetka uchun 10 mA.
• Yong'indan himoya uchun umumiy kirishga 100–300 mA.

UZO nominal toki oldidagi avtomatdan bir pog'ona katta bo'lishi kerak: masalan 25 A avtomat uchun 32 A UZO.

Differavtomat — avtomat va UZO bitta korpusda. Joy kam bo'lganda qulay.

Ikki shart tekshiriladi va kattarog'i olinadi:

• Qizish bo'yicha — PUE 1.3.4 (mis) va 1.3.5 (alyuminiy) jadvallari.
• Kuchlanish yo'qotilishi bo'yicha — uzun liniyalarda hal qiluvchi. Chegara odatda 5 %.

Uy uchun amaliy qoida: yoritish 1,5 mm², rozetka 2,5 mm², plita va konditsioner 4–6 mm², kvartira kirishi 6–10 mm² (mis).

Bino ichida alyuminiyni 16 mm² dan kichik qilib qo'llamang.

Tartib yuqoridan pastga: kirish avtomati → hisoblagich → umumiy UZO → guruh avtomatlari. Nol va yer uchun alohida shinalar.

• Guruhlarni ajrating: yoritish, rozetka, oshxona, hammom, konditsioner.
• Har bir guruh o'z avtomati bilan — nosozlik butun uyni o'chirmasin.
• Modul sonini 20–30 % zaxira bilan oling.
• Har bir avtomatni markirovka qiling. Bir yildan keyin o'zingiz ham eslay olmaysiz.

Simlarni nakonechnik bilan qisish shart — yalang ko'p tomirli simni vint ostiga qo'yish qizishga olib keladi.

Hisob nur oqimi (lyumen) bo'yicha yuritiladi, vatt bo'yicha emas.

• Yashash xonasi va oshxona — 150 lk, yotoqxona — 100 lk, ish kabineti — 300 lk, do'kon zali — 300 lk, yo'lak — 50 lk.
• Kerakli nur = yoritilganlik × maydon. So'ng bitta chiroq nuriga bo'linadi.
• Foydalanish koeffitsienti: och rangli xona 0,8, o'rtacha 0,7, to'q rangli 0,6.

Bitta kuchli chiroq o'rniga bir nechta kichigi qo'yilsa, soya kamayadi va yorug'lik tekis taqsimlanadi. Aniq hisob uchun — Kalkulyator → Yorug'lik.

Tizim to'rt qismdan iborat: panel → kontroller/inverter → akkumulyator → yuk. Eng ko'p xato akkumulyator sig'imini kam olishda bo'ladi.

• Kunlik iste'molni kVt·soatda hisoblang, so'ng panel quvvatini tanlang.
• DC tomonda ham himoya kerak: DC avtomat va UZIP (chaqmoqdan himoya).
• Panellarni ketma-ket ulaganda kuchlanish, parallel ulaganda tok qo'shiladi — inverter chegaralarini tekshiring.
• Kabelni tashqi muhitga chidamli (UV) turdan oling.